Është gjetur i pajetë pas disa orësh kërkimesh i riu 20 vjeçar, djali i një familje emigrantësh shqiptarë, i zhdukur që nga pasditja e 20 shkurtit në Civitanova Marche, pasi kishte ushtruar një agresion të dhunshëm ndaj nënës së tij në banesën e tyre.
Trupi i Riccardo Merkurit u gjet në det rreth mesditës së sotme, sipas konfirmimit të zjarrfikësve.
Sipas rindërtimit të ngjarjes nga karabinierët, gjithçka ka ndodhur rreth orës së darkës. Në shtëpi ndodheshin vetëm i riu dhe nëna e tij, Albana, pronare e një qendre estetike; babai, Mario Merkuri, një sipërmarrës i vogël ndërtimi, dhe djali tjetër nuk ishin në banesë. Një debat, për arsye ende të paqarta, i cili ndodhi pikërisht në ditën e 20-vjetorit të të riut, ka degjeneruar në dhunë. Një fqinje ka dëgjuar britma dhe thirrje për ndihmë dhe ka njoftuar autoritetet.
Kur forcat e rendit mbërritën në apartament, i riu ishte larguar tashmë. Gruaja u gjet pa ndjenja në banjë. Ajo u transportua në spitalin e Maceratas, ku rezultoi me frakturë të nofullës dhe u vendos në koma farmakologjike. Gjendja e saj është e rëndë, por nuk raportohet të jetë në rrezik për jetën.
Ndërkohë nisën kërkimet për 20-vjeçarin, i hetuar për plagosje të rëndë. Merkuri ishte larguar me makinën e tij, një Mercedes Classe A, duke lënë celularin në shtëpi. Telefoni u sekuestrua për të verifikuar mesazhe apo kontakte të mundshme të dobishme për hetimet. Automjeti u gjet të nesërmen në parkingun e Largo Donatori di Sangue, në hyrje të portit të Civitanova Marche.
Më pas, autoritetet kërkuan nga Zyra Rajonale Detare të shiheshin pamjet e kamerave të sigurisë. Në video, i riu shihet duke hyrë në zonën portuale dhe duke arritur në molin jugor. Pamjet tregojnë se ai hidhet një herë në det nga bregu. Më pas del në sipërfaqe, ngjitet sërish dhe hidhet përsëri në ujë pak më tej. Që nga ai moment, ai nuk shfaqet më në pamje.
Operacionet e kërkimit u kryen nga zjarrfikësit, me njësinë e zhytësve nga Teramo, në bashkëpunim me rojën bregdetare dhe karabinierët.
