Një aksident rrugor ka ndodhur disa minuta më parë në aksin Fier–Levan, në zonën e njohur si “Qafa e Koshovicës”.
Një automjet tip “Ford” ka dalë nga rruga dhe është përplasur me një shtyllë të tensionit të lartë, duke shkaktuar plagosjen e dy personave.
Sipas informacioneve paraprake, shkak për aksidentin dyshohet të ketë qenë një manovër e rrezikshme parakalimi nga një fugon, i cili i ka prerë rrugën “Ford”-it. Për pasojë, drejtuesi i këtij të fundit nuk ka mundur të shmangë përplasjen.
Të plagosurit janë dërguar me urgjencë në Spitalin Rajonal të Fierit dhe ndodhen jashtë rrezikut për jetën, nën kujdesin e mjekëve.
Në vendngjarje ndodhen shërbimet e Policisë Rrugore dhe grupi hetimor, të cilët po punojnë për zbardhjen e plotë të rrethanave të aksidentit dhe identifikimin e drejtuesit të fugonit që dyshohet se shkaktoi ngjarjen.
