Një aksident me pasoja fatale ka ndodhur pak momente më parë, ku janë përfshirë katër automjete. Ngjarja ka ndodhur në hyrje të autostradës së Elbasanit, pranë zonës së Xibrakës.
Si pasojë e përplasjes së fortë, një shtetas i huaj ka humbur jetën në vendngjarje, ndërsa gjashtë persona të tjerë kanë mbetur të plagosur. Viktima, sipas informacioneve paraprake, ndodhej në një nga mjetet e përfshira në aksident dhe nuk ka mundur t’u mbijetojë plagëve.
Të lënduarit janë transportuar menjëherë drejt spitalit për ndihmë mjekësore, ndërsa gjendja e tyre ende nuk bëhet e ditur.
Në vendngjarje kanë mbërritur forca të shumta policie, shërbimet e urgjencës dhe zjarrfikësit, të cilët kanë ndërhyrë për nxjerrjen e personave nga automjetet e dëmtuara rëndë.
Ndërkohë, Policia Rrugore e Shqipërisë po punon për menaxhimin e trafikut dhe normalizimin e qarkullimit në zonë, pasi si pasojë e aksidentit, autostrada ka mbetur e bllokuar përkohësisht.
Shkaqet e aksidentit ende nuk janë bërë të ditura dhe pritet një hetim i plotë nga autoritetet.
