Rreth 60% e qytetarëve në Shqipëri rezultojnë mbi peshë, ndërsa afro 20% klasifikohen obezë.
Specialistët e Instituti të Shëndetit Publik, paralajmërojnë se fenomeni po bëhet gjithnjë e më shqetësues, veçanërisht edhe tek fëmijët.
Sipas tyre, të dhënat e studimit të fundit tregojnë se një pjesë e madhe e popullsisë shqiptare përballet me probleme të peshës trupore.
“Rreth 60% e popullatës shqiptare rezulton mbi peshë, ndërsa afërsisht 20% klasifikohet me obezitet. Gjithashtu, sot 1 në 10 fëmijë është mbi peshë ose obez”.
Në të kaluarën, obeziteti lidhej kryesisht me konsumimin e tepërt të ushqimit dhe stilin e jetesës sedentare. Megjithatë, sipas specialistëve, sot po identifikohen edhe faktorë të tjerë që ndikojnë në shtimin e peshës.
“Përveç faktorëve biologjikë dhe gjenetikë në nivel individual, gjithnjë e më shumë po flitet për ndikimin e faktorëve mjedisorë dhe emocionalë. Aksesi i lehtë në ushqime të përpunuara, me përmbajtje të lartë kalorike dhe vlera të ulëta ushqyese, është një nga arsyet kryesore të rritjes së obezitetit. Gjithashtu, cilësia e dobët e gjumit është një element që ndikon ndjeshëm në shtimin e peshës”, thekson specialistja, duke shtuar se ndërhyrja për parandalim duhet të nisë që herët dhe jo vetëm pasi të shfaqet mbipesha.
Një nga faktorët kyç për parandalimin e obezitetit mbetet ushqyerja me gji në muajt e parë të jetës. Sipas specialistëve, ajo ndihmon në uljen e rrezikut për mbipeshë që në fëmijëri.
“Fatkeqësisht, në vendin tonë po vërehet rënie e shifrave të ushqyerjes ekskluzive me gji, e cila është një nga elementët më të rëndësishëm për parandalimin e obezitetit”.
Ekspertët paralajmërojnë se pasojat e obezitetit janë serioze për shëndetin. Ajo rrit ndjeshëm rrezikun për sëmundje kronike si diabeti i tipit 2, sëmundjet kardiovaskulare dhe disa forma kanceri.
Në nivel global, vlerësohet se rreth 3 miliardë njerëz janë mbi peshë ose obezë, ndërsa parashikimet tregojnë se deri në vitin 2035 kjo shifër mund të arrijë në rreth 4 miliardë.
