Një 19-vjeçar është arrestuar në Gjirokastër, pasi dyshohet se ka vjedhur dy herë para nga arka e një objekti kulti në lagjen “Partizani”. Ajo që e bën më të veçantë rastin është se i riu kishte përfunduar vetëm një javë më parë dënimin me burgim për veprën penale të vjedhjes.
Njoftimi i policisë:
Gjirokastër/Finalizohet operacioni i koduar “Arka”.
Vodhi 2 herë në arkën e një objekti kulti, 1 javë pasi kishte kryer dënimin me burgim, për vjedhje, vihet në pranga 19-vjeçari.
Shërbimet e Komisariatit të Policisë Gjirokastër, si rezultat i administrimit të shpejtë të kallëzimit të administratorit të një objekti kulti, në lagjen Partizani, se mbrëmjet e datave 8 dhe 9 nëntor, ishin vjedhur shuma parash, nga arka e objektit, finalizuan operacionin e koduar “Arka”.
Në kuadër të operacionit u identifikua, u lokalizua dhe u arrestua autori i dyshuar i vjedhjeve, shtetasi K. Ll., 19 vjeç, banues në Gjirokastër.
Hetimi vijon për të zbardhur dhe dokumentuar me prova ligjore, vjedhje të tjera që mund të ketë kryer ky shtetas.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
