Një aksident tragjik ka ndodhur në Itali. Parakalimi i gabuar i një 29-vjeçareje shqiptare ka lënë pas dy viktima dhe tetë të plagosur. Viktimat i përkasin moshës 38 dhe 73 vjeç, ndërsa mes të plagosurve ka edhe fëmijë.
Ngjarja tragjike ndodhi në 15 mars, pak minuta pas orës 12.30 në rrugën provinciale 185 “Rivoltana”, në shtrirjen që të çon në Mozzanica te restoranti Montizzolo. Katër makina u përfshinë në aksident, ku dy persona humbën jetën.
Mediat italiane shkruajnë se aksidenti u shkaktua nga një Mercedes C180, drejtuar nga një 29-vjeçare shqiptare, me banim në Calvenzano, e cila dyshohet se ka tentuar të parakalojë një Volkswagen Sharan me të cilin udhëtonte një familje e përbërë nga babai, nëna dhe tre fëmijë.
“Ajo donte të më parakalonte, pastaj kuptoi se nuk kishte vend dhe u përpoq të kthehej brenda, duke më goditur anash dhe duke më bërë të humbja kontrollin”, thotë shoferi i Volkswagen.
Pas goditjes së parë, Mercedesi gjithashtu u bë i pamenaxhueshëm, duke përfunduar në korsinë tjetër, ku në atë moment një Citroen C5 me një familje me pesë anëtarë që banonte në Cernusco sul Naviglio dhe po mbërrinte nga Caravaggio. Një burrë 38-vjeçar po voziste, pranë tij gruan e tij 35-vjeçare dhe pas tij ndodheshin vajzat e tyre të moshës 5 dhe 6 vjeç dhe vjehrra e tij 73- vjeçare.
Përplasja mes dy makinave ishte frontale dhe shumë e dhunshme. Hunda e Mercedesit u thye, ndërsa makina u rrotullua tre herë mbi vete para se të ndalonte. Më e keqja ishte C5, i cili përfundoi jashtë rrugës duke rënë në një hendek.
Duke dëgjuar zhurmën e përplasjes, pronarët dhe shumë klientë nxituan nga restoranti Montizzolo duke u përpjekur të ndihmonin. Në vendngjarje mbërritën menjëherë ekipet e zjarrfikësve dhe ambulanca, ndërsa dy helikopterë u dërguan në vendngjarje. Autoritetet italiane po hetojnë më shumë mbi aksidentin tragjik.
