Shumë banesa kanë qenë në fokusin e përmbytjeve nga vërshimi i pakontrolluar i ujërave në territorin e Bashkisë së Gjirokastrës. Por më e goditura, rezulton kjo shtëpi një katëshe në fshatin “Arshi Lengo” pjesë e Njësisë Administrative Antigone.
Nga kodra përbri banesës, u dyndën inerte ranore e shtufore, aq sa në një përllogaritje të specialistëve, besohet se në 100 metër katrorë hapësirë që ka kjo banesë, të jenë dyndur 50 metër kub rërë e baltë së bashku pa llogaritur ujin.
Burbuqja, e zonja e shtëpisë, ende vazhdon të “dëbojë” ujin e përrenjve të hapura rishtazi tre ditë më parë e bashkë me të dhe baltën nga dhomat e shtëpisë.
Ajo është emigrante në Greqi dhe e lajmëruan se shtëpinë e mori lumi. Kur ka ardhur është ndeshur me hatanë që i kishte ndodhur. Dhomat plot e përplot me ujë e baltë me një trashësi mbi 60 cm.
Për të ardhur në këtë gjendje, që siç po e shikoni ne video, i është dashur 48 orë.
Gjithçka që kishte kursyer në 30 vite emigrim në Greqi ajo dhe bashkëshorti i saj Agim Çela, e mori përroi për 10 minuta.
Dëmet janë të pallogaritshme, pasi të gjitha orenditë shtëpiake i kanë dalë jashtë funksionit.
Bashkë me to dhe themelet e shtëpisë janë tronditur, si pasojë e intensitetit të reshjeve dhe vërshimit të baltës shtufore. Por ajo që paraqet rrezikshmëri, është prezenca e tre gureve të mëdhenj sipër shtëpisë në një largësi prej 100 metrash pjesrrësi, që cënojnë seriozisht këtë banesë dhe bujtësit e saj.
Ndërhyrja për evadimin e këtyre gureve, paraqet urgjencë për të shmangur ndonjë tragjedi të padëshirueshme.
Burbuqe Çela rrëfen momentet me të cilat ajo u ndesh me shtëpinë e saj.
Deri tani vlerësohen se janë 10 banesa që paraqesin probleme dhe që janë të braktisura nga bujtësit e tyre në territorin e Qarkut të Gjirokastrës, për shkak të gjendjes fizike dhe rrezikshmërisë që paraqesin pasi ishin objekt i goditjes nga vërshimi i ujërave dhe baltës.
