I emëruari i presidentit Donald Trump për postin e Ambasadorit amerikan në Shqipëri, Eric Wendt, ka dhënë një mesazh tepër pozitiv për Shqipërinë dhe shqiptarët gjatë seancës dëgjimore në Komitetin e Jashtëm të Senatit Amerikan.
Në fjalën e tij para senatorëve amerikanë, gjenerali me eksperiencë të gjatë në forcat speciale amerikane u ndal veçanërisht te bashkëpunimi që ka pasur me trupat shqiptare gjatë karrierës së tij ushtarake, duke i krahasuar ato me frymën luftëtare të heroit kombëtar shqiptar, Gjergj Kastrioti Skënderbeu.
“Si komandant i Forcave Speciale të NATO-s, trupat speciale shqiptare ishin pjesë e komandës sime dhe kam punuar me ta në terren në Shqipëri”, deklaroi Wendt.
Ai kujtoi gjithashtu eksperiencën e tij në Afganistan, ku ka shërbyer si zëvendëskomandant i një komande rajonale ku merrnin pjesë edhe ushtarë shqiptarë.
“Kam zbuluar se trupat speciale shqiptare mishërojnë frymën luftëtare të heroit shqiptar Skënderbeu dhe vetë populli shqiptar është krenar, punëtor dhe mikpritës”, tha ai para Komitetit të Jashtëm të Senatit.
Deklarata e tij u konsiderua si një nga momentet më të spikatura të dëshmisë, pasi vendosi theksin jo vetëm te bashkëpunimi ushtarak mes SHBA-ve dhe Shqipërisë, por edhe te respekti për historinë dhe identitetin shqiptar.
Wendt, i cili ka shërbyer për më shumë se 34 vite në ushtrinë amerikane, përfshirë 30 vite si “Beretë e Gjelbër”, tha se nëse konfirmohet në detyrë do të fokusohet në forcimin e marrëdhënieve mes dy vendeve, luftën kundër korrupsionit dhe krimit të organizuar, si dhe zgjerimin e bashkëpunimit në mbrojtje dhe ekonomi.
Ai përmendi gjithashtu mbështetjen për rritjen e kapaciteteve të sigurisë kibernetike dhe investimeve amerikane në sektorë si energjia, Inteligjenca Artificiale dhe infrastruktura në Shqipëri.
Por pjesa që tërhoqi më shumë vëmendje ishte mënyra se si ai foli për ushtarët dhe popullin shqiptar, duke e lidhur karakterin e tyre me figurën historike të Skënderbeut — një krahasim që rrallë dëgjohet në nivelet më të larta të diplomacisë amerikane.
Deklaratat e Wendt vijnë në një moment kur marrëdhëniet mes Shqipëria dhe Shtetet e Bashkuara të Amerikës konsiderohen ndër më të fortat në rajon, veçanërisht në fushën e mbrojtjes dhe bashkëpunimit strategjik brenda NATO.
