Një tragjedi familjare është regjistruar në Itali, ku katër persona janë gjetur të pajetë brenda një banese në Rughi, në provincën e Luccës. Sipas të dhënave paraprake, dyshohet se shkak i vdekjes ka qenë helmimi nga monoksidi i karbonit, ndërsa familja mendohet të jetë shqiptare.
Tragjedia ka ndodhur mbrëmjen e së mërkurës, kur në banesë është konstatuar prania e gazit vdekjeprurës, i dyshuar si pasojë e një defekti teknik. Viktimat janë babai 48 vjeç, nëna 43 vjeçe dhe dy fëmijët e tyre, të moshës 22 dhe 15 vjeç. Identitetet e tyre nuk janë bërë ende publike nga autoritetet.
Vëllai i 48-vjeçarit, i cili shkoi për t’i kontrolluar pasi familjarët nuk po përgjigjeshin, është gjetur në gjendje të rëndë dhe është transportuar me urgjencë drejt spitalit “Cisanello” në Piza, ku ndodhet nën kujdes intensiv.
Në vendngjarje kanë ndërhyrë menjëherë shërbimet e emergjencës, ambulancat dhe zjarrfikësit nga Lucca, të cilët kanë hyrë në banesë për të verifikuar nëse kishte persona të mbijetuar.
Mediat italiane raportojnë se familja dyshohet të jetë me origjinë të huaj, me shumë mundësi shqiptare. Ngjarja ka tronditur komunitetin lokal, ndërsa hetimet vijojnë për të përcaktuar shkaqet e sakta të këtij helmimi fatal.
