Policia e Shtetit ka arrestuar një 28-vjeçar pasi një natë më parë përplasi me makinë një 62-vjeçar i cili po lëvizte me biçikletë në aksin ”Elbasan-Bradashesh”.
Fatkeqësisht blutë bëjnë me dije se 62-vjeçari ka ndërruar jetë në spital. I riu raportohet se po e drejtonte makinën i dehur.
“Specialistët e Sektorit të Qarkullimit Rrugor arrestuan në flagrancë shtetasin L. B., 28 vjeç, për veprat penale “Drejtimi i automjeteve në mënyrë të parregullt” dhe “Shkelja e rregullave të qarkullimit rrugor”, me pasojë vdekjen.
Mbrëmjen e djeshme, në aksin rrugor “Elbasan-Bradashesh”, shtetasi L. B. dyshohet se duke drejtuar automjetin, në gjendje të dehur, ka përplasur shtetasin Xh. R., 62 vjeç, që lëvizte me biçikletë, i cili ka humbur jetën në spital”, njoftoi sot policia.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
