Stuhia atlantike “Charles” pritet të përfshijë Portugalinë më 11 nëntor, me erëra të fuqishme që në zonat më të ekspozuara mund të arrijnë deri në 140 kilometra në orë. Përballë përkeqësimit të motit, autoritetet portugeze kanë shpallur alarm të kuq në tetë distrikte, përfshirë Lisbonën, si dhe kanë vendosur mbylljen e shkollave dhe të shërbimeve publike joesenciale.
Sipas parashikimeve të BBC Weather, sistemi i motit të keq do të zhvendoset më pas drejt jugut të Francës dhe veriperëndimit të Italisë, përpara se të prekë edhe rajonin e Ballkanit Perëndimor.
Në Shqipëri, përkeqësimi më i ndjeshëm i motit parashikohet të premten, më 13 nëntor. Reshjet më intensive pritet të përqendrohen në veri dhe veriperëndim të vendit, ndërsa në zonat e tjera parashikohen reshje më të pakta.
Të enjten dhe të premten, era pritet të jetë e fortë, duke kaluar 80 kilometra në orë në det të hapur dhe duke arritur rreth 65 kilometra në orë pranë brigjeve jugperëndimore.
Ndikimi i sistemit atmosferik pritet të shtrihet edhe në vende të tjera të rajonit. Në Kroaci, përgjatë bregdetit të Adriatikut, parashikohen erëra me forcë stuhie, ndërsa në Bosnjë-Hercegovinë reshjet më të dendura pritet të përfshijnë Hercegovinën dhe pjesën perëndimore të vendit.
Në zonat malore, gjatë natës mes së premtes dhe së shtunës, reshjet e shiut mund të shndërrohen në dëborë. Moti i paqëndrueshëm pritet të prekë gjithashtu Malin e Zi, Slloveninë, Kosovën, Maqedoninë e Veriut dhe disa zona të Greqisë.
