Dy shtetas italianë janë arrestuar nga Policia në Torino, për vrasjen e shqiptarit 55 vjeçar Mikel Rroku, i cili ishte shef picash dhe u gjet i vdekur brenda apartamentit të tij, disa ditë pasi ishte qëlluar barbarisht me çekiç në kokë.
U deshën saktësisht tre muaj për të zgjidhur misterin. Ishin banorët e pallatit që njoftuan autoritetet për erën e keq që vinte nga apartamenti i Mikel Rrokut dhe kur karabinierët arritën, gjetën 55 vjeçarin të vdekur.
Kur hynë në apartamentin në katin e dytë dhe të sipërm të ndërtesës me zjarrfikësit, oficerët e stacionit të Vallette menduan se ishte vetëvrasje ose një tragjedi vetmie. Megjithatë, analizat fillestare të mjekut ligjor zbuluan lëndime të rënda në kokë, të cilat më vonë u konfirmuan nga autopsia: Rroku ishte vrarë me goditje çekiçi.
Prandaj, përgjegjësia për rastin ra mbi Karabinierët e Njësisë Hetimore të Komandës Provinciale, të cilët hapën një hetim për vrasje, të koordinuar nga prokurorja Lea Lamonaca.
Hetimi ka arritur në një pikë kthese me arrestimin e gruas së tij dhe partnerit të saj, të dy italianë. Sipas prokurorisë, ata planifikuan dhe kryen krimin së bashku, duke e zënë në befasi Mikel Rrokun në apartamentin e tij të vogël në lagjen Lucento.
Gruaja e tij, 45 vjeçe dhe partneri i saj, 52 vjeç, janë arrestuar për vrasje me paramendim dhe pritet të përballen me akuzat në gjykatë.
