Bill Gates ka paralajmëruar se inteligjenca artificiale mund të krijojë rreziqe me pasoja jashtëzakonisht të mëdha nëse përdoret nga aktorë keqdashës.
“Inteligjenca artificiale është mjaftueshëm e fuqishme sa të mund të shkaktojë ngjarje që do të çonin në vdekjen e një miliard njerëzve”, deklaroi Gates në një intervistë për NBC.
“Nuk ka ekzistuar kurrë një armë aq e fuqishme sa kombinimi i njerëzve keqdashës me mjetet më të fundit të inteligjencës artificiale”, tha ai.
Sipas Gates, një nga problemet është se zhvillimi aktual i AI-së po trajtohet në të njëjtën mënyrë si revolucionet e mëparshme teknologjike, me pritshmërinë se problemet do të zgjidhen vetë.
“Por nuk funksionon kështu”, tha ai. Gates argumenton se industria e teknologjisë mund t’i identifikojë rreziqet, por rregullat duhet të vendosen nga institucionet shtetërore.
“Industria mund ta bëjë diagnozën, por rregullat duhet të vijnë nga jashtë, nga qeveritë. Megjithatë, qeveritë nuk po e bëjnë këtë”, deklaroi ai.
Ai shtoi se po përdor reputacionin që ka ndërtuar gjatë karrierës për të tërhequr vëmendjen ndaj asaj që e konsideron mungesë të masave të mjaftueshme për kufizimin e dëmeve të mundshme dhe shfrytëzimin e përfitimeve të AI-së.
“Inteligjenca artificiale po ecën shumë shpejt”
Gates beson se është e mundur të zhvillohet një inteligjencë artificiale me njeriun në qendër, por e konsideron këtë një sfidë të madhe. “Teknologjia është shumë më përmbysëse se çdo teknologji tjetër që është shfaqur deri më sot, përfshirë ato me të cilat pata fatin të punoja, si kompjuteri personal dhe interneti”, tha ai.
Sipas tij, AI-ja “në shumë mënyra barazohet ose tejkalon aftësitë njohëse njerëzore” dhe për këtë arsye do të përbëjë një provë të paprecedentë për njerëzimin. Megjithatë, Gates nuk mbështet ndalimin e zhvillimit të inteligjencës artificiale.
“Të ndalosh gjithçka nuk është përgjigjja e duhur dhe do të ishte zhgënjyese. Do të hiqnim dorë gjithashtu nga mundësia për të gjetur trajtime për sëmundjet, mjete për përballimin e ndryshimeve klimatike dhe shumë problemeve të tjera”, tha ai.
Në vend të ndalimit, Gates kërkon masa dhe mekanizma sigurie për të kufizuar rreziqe të tilla si sulmet kibernetike dhe sulmet biologjike.
Ai vlerësoi gjithashtu përfshirjen e Kishës në debatin për inteligjencën artificiale dhe rolin e Papës në këtë diskutim. “E konsideroj të rëndësishme ndërhyrjen e Papës për të kujtuar vlerat e qëndrueshme të Kishës, sepse ai nuk thotë se gjithçka është e tmerrshme, por se disa gjëra mund të ndodhin nëse nuk mbrojmë atë që duhet”, deklaroi Gates.
