Prokuroria e Tiranës ka kërkuar caktimin e masës së sigurisë “Arrest me burg”, për Majlinda Dehimën, edukatorja e cila dhunoi 3-vjeçaren në kopshin privat “Stinët”.
Prokuroria i ka bërë kërkesë ditën e sotme Gjykatës, duke argumentuar se Dehima akuzohet për veprën penale “Keqtrajtim i të miturit” dhe duhet të qëndrojë në burg deri në përfundim të hetimeve ndaj saj.
Kujtojmë se rasi i rëndë u bë publik në një emision investigativ, ku u dëshmua me pamje dhe zë se si edukatorja e dhunonte vajzën e mitur, madje duke i thyer edhe këmbën.
Njoftimi i Prokurorisë:
Prokuroria pranë Gjykatës së Juridiksionit të Përgjithshëm Tiranë kërkoi caktimin e masës së sigurimit “Arrest në burg” parashikuar nga neni 238 i K.Pr.Penale, për personin nën hetim M. D., për veprën penale “Keqtrajtim i të miturit”, të parashikuar nga neni 124/b/1 i K.Penal.
Kjo masë u kërkua menjëherë pas marrjes në dorëzim ditën e sotme, më dt. 09.11.2023, të procesverbalit për kqyrjen e pamjeve filmike (usb), i cili është mbajtur më dt. 08.11.2023. Me shkresën nr. 9538/1 prot., dt. 08.11.2023, protokolluar në Prokurori me nr. 10983 prot., dt. 09.11.2023, Instituti i Mjekësisë Ligjore, ka përcjellë aktin e ekspertimit mjeko-ligjor.
Prokuroria pranë Gjykatës së Juridiksionit të Përgjithshëm Tiranë, po kryen veprimet e tjera procedurale për dokumentimin e faktit, në kuadër të procedimit penal nr. 7527, i regjistruar pas kallëzimit mbi bazën e materialeve të referuara nga Drejtoria e Policisë së Qarkut Tiranë, Komisariati i Policisë nr.1, për Veprën Penale “Keqtrajtimi i të miturit”, parashikuar nga neni 124/b i Kodit Penal.
