Një regjistrim audio në lidhje me të ashtuquajturën “mafia e ndërtimit” në Mykonos ka 1 vit e gjysmë ka mbetur i paprekur nga policia greke. Sipas informacioneve të portalit “DataJournalists”, bëhet fjalë për një bisedë 5-orëshe mes Alfons Doçit, i vrarë në burgun e Korydallos dhe një kryekontraktori nga Mykonos, të cilin ai e kishte denoncuar si autor të porositjes së një vrasjeje ndaj një agjenti të njohur të pasurive të paluajtshme nga Mykonosi, të cilën e kishte marrë përsipër vetë Doçi.
Në fund të qershorit 2024, Alfons Doçi, me origjinë shqiptare, u vra brenda burgut të Korydallos. Ai ishte një person i njohur për autoritetet me një të kaluar të rëndë kriminale. Më 12 mars 2015, Doçi kishte vrarë me gjakftohtësi një 53-vjeçar, pronar të një dyqani në Elefsinë, ndërsa kishte grabitur edhe gruan e viktimës.
Më 6 tetor 2015, gjatë një grabitjeje në një shtëpi në Aspropirgos, një 75-vjeçare u godit në kokë, e cila ndërroi jetë pak ditë më vonë.
Më 30 mars 2016 u zbërthye banda ku ai bënte pjesë, e cila përveç dy vrasjeve kishte kryer të paktën 5 grabitje shtëpish.
Më 9 maj 2018, 35-vjeçari arriti të arratisej gjatë transferimit të tij në Kretë së bashku me 3 të burgosur të tjerë. Një prej tyre ishte njeriu që e vrau në burgun e Korydallos.
Nga hetimet e policisë rezulton se sherri në Korydallos ka nisur për një arsye të parëndësishme, mes viktimës dhe një të burgosuri tjetër. Gjithçka filloi kur oficerët e burgut i futën të burgosurit në qelitë e tyre. Mirëpo, disa prej tyre kanë reaguar për shkak të vapës së madhe. Më pas ka shpërthyer një sherr dhe ka pasur një përleshje.
Siç tregohet në një video që u bë publike, dy të burgosur iu afruan 35-vjeçarit Doçi dhe filluan ta rrahin. Më pas njëri prej tyre nisi ta godiste me thikë duke bërë që Doçi të humbë jetën. Vrasja e 35-vjeçarit ndodhi vetëm një javë para vrasjes gjakftohtë të inxhinierit topograf, 54-vjeçarit Panagiotis Stathis në Psychiko.
Ky ishte një person që vitet e fundit ishte aktivizuar profesionalisht në Mykonos. Vrasja e topografit solli edhe një herë në vëmendje çështjen e nxehtë të mafies së ndërtimit në Mykonos, e cila vazhdon të veprojë e pakontrolluar. Tashmë është arrestuar autori i dyshuar i kësaj vrasjeje, por jo porositësi i vrasjes.
Doçi dhe kontraktori i madh i Mykonos
Vitet e fundit para vrasjes së tij, Doçi jetonte në Mykonos, ku kryente punë në ndërtim. Në fakt, ai ishte i lidhur ngushtë me një kontraktor të madh të njohur në Mykonos, i cili në të kaluarën ishte përfshirë edhe në një rast vrasjeje, për të cilën më pas u shpall i pafajshëm ndërsa kufoma nuk u gjet kurrë.
Për një arsye të panjohur, në një moment të dy burrat kanë pasur një konflikt. Në nëntor 2022, Doçi u përfshi në një rast grabitjeje dhe një sulmi ndaj kontraktorit kryesor, së bashku me dy bashkatdhetarë të tjerë. Autorët hynë në zyrën e kontraktorit dhe filluan ta rrahin.
Mirëpo, njëri prej tyre harroi armën që kishte me vete në tavolinën e kontraktorit. Ky i fundit, sapo gjeti rastin, rrëmbeu armën dhe filloi t’i kërcënonte. Autorët u larguan, por kanë arritur të zhvatin 30 mijë euro. Kontraktori i madh ngriti një padi për sulm. Në qershor 2023, autorët u arrestuan në qendër të Athinës pas një ndjekjeje aventureske. Mes tyre ishte edhe Alfons Doçi.
Audioja që injorohet edhe sot
Pas arrestimit, Doçi është transferuar në Departamentin e Armëve të Policisë Helenike. Aty, sipas informacioneve të DataJournalists”, ai ka njoftuar policinë se posedonte një audio. Ky ishte, siç pretendonte Doçi, një audio-incizim në të cilin dyshohet se regjistronte në celular kontraktorin, gjatë një bisede 5-orëshe mes tyre. Audioja dyshohet se përmbante, sipas të njëjtave burime, referenca për persona të veçantë dhe veprime të lidhura me mafian e ndërtimit në Mykonos.
Audioja i është përcjellë Drejtorisë së Hetimeve Kriminale të Policisë Helenike (EL.AS) për përpunim dhe transkriptim të bisedave. Megjithatë, deri më sot fati i saj nuk dihet. Sipas informacioneve të “DataJournalists”, audio nuk i është përcjellë Departamentit të Krimeve Kundër Jetës, i cili ka marrë përsipër hetimet si për vrasjen e Doçit ashtu edhe për inxhinierin topograf 54-vjeçar.
Nuk dihet pse. Edhe pse ka të ngjarë të ketë të dhëna të vlefshme në hetimet e autoriteteve policore për goditjen e të ashtuquajturës mafia e ndërtimit në Mykonos.
Ekzistenca e audios është përmendur nga vetë Doçi gjatë gjyqit në Syros në mars 2024, kur akuzohej për sulmin dhe grabitjen ndaj kontraktorit të Mykonos. Ishte një gjyq që i ngjante një fortese nga frika e incidenteve mes dy palëve. Procedurat u monitoruan personalisht nga kreu i Prokurorisë së Apelit të Rajonit të Egjet. Prokurori me përvojë kishte urdhëruar praninë e forcave të forta policore me asistencën edhe të efektivëve të policisë EKAM nga Athina.
Kontrata ndaj një ndërmjetësi dhe denoncimi ndaj Doçit
Doci kishte denoncuar edhe diçka tjetër pranë autoriteteve. Ekzistenca e një kontrate vdekjeje ndaj një agjenti të njohur imobiliar në Mykonos, me urdhër të kontraktorit të cilin ai e kishte regjistruar fshehurazi. Ngjarja ka ndodhur në vitin 2020. Agjenti imobiliar u sulmua jashtë shtëpisë së tij. Një burrë i kishte ngritur një pritë, duke mbajtur një shufër hekuri. Kur u shfaq ndërmjetësi, ai filloi ta godiste në krahë dhe këmbë, duke i shkaktuar fraktura të rënda. Ndërmjetësi foli publikisht për atë që kishte ndodhur. Ai vuri në dukje “arbitraritetin e ishullit”, siç i quajti ai, si nxitësit moralë të sulmit kundër tij.
Sipas raportimeve, ka pasur mbi 100 raste abuzimi në vila, hotele dhe dyqane në të cilat dyshohet se janë përfshirë emra të rëndësishëm në ishull. Ndërmjetësi kishte bërë ankesa me shkrim si në organet kompetente ashtu edhe në rrjetet sociale. Autori i atentatit ishte Alfons Doçi, siç ka pranuar para autoriteteve dy vite më vonë.
Sipas asaj që ai kishte dëshmuar, sulmi është kryer me urdhër të dhënë nga kontraktori i Mykonos me të cilin ai bashkëpunonte në atë kohë. Ndaj Doçit u ngrit një procedim penal për tentativë vrasje ndaj ndërmjetësit, ndërsa zhvilluesi i Mykonos u procedua penalisht për nxitje të vrasjes së mbetur në tentativë.
Dy burrat ishin planifikuar të dilnin në gjyq në Naxos më 14 qershor 2024, megjithatë, pas një kërkese nga pala e Doçit, çështja u shty. Ky gjyq tani ka filluar. Në fakt, në një seancë dëgjimore të fundit, pala e ndërmjetësit thuhet se argumentoi për ekzistencën e një regjistrimi të dytë audio në të cilin ishte regjistruar një kontraktor. Këtë herë nga ndërmjetësi.
Celularët “e fikur” të autorëve të vrasjes së Doçit
Në lidhje me vrasjen e Doçit, tashmë janë ngritur procedime ndaj dy personave, njëri për vrasje dhe tjetri për bashkëpunim. Njëri prej tyre ishte një bashkëkombës i Doçit, me të cilin ishin arratisur së bashku më 9 maj 2018, gjatë transferimit të tyre në Kretë, pak përpara portit të Pireut. Autori i vrasjes së Doçit ishte i përfshirë në një kontratë vdekjeje ndaj një greku në Kalamatë në vitin 2011. Në momentin e vrasjes viktima ishte me fëmijën e tij 2 vjeç, të cilin autori e vrau edhe duke i prerë fytin me thikë.
Gjatë hetimeve për vrasjen e Doçit nga organet e hetuesisë, u bë një kërkesë për hapjen e celularëve të autorëve për të parë se me kë kishin folur para dhe pas vrasjes. Qëllimi ishte të shihej nëse vrasja e Doçit ishte një ngjarje e rastësishme apo ishte një vrasje e urdhëruar nga një person ndoshta i lidhur me mafian e Mykonos. Megjithatë, kërkesa nuk u pranua. Telefonat nuk u ndezën kurrë.
