Policia e Vlorës ka arrestuar një person dhe ka shpallur në kërkim dy të tjerë, në kuadër të një operacioni të zhvilluar nën drejtimin e Prokurorisë së Posaçme.
Ndaj të treve është dhënë masa e arrestit me burg nga Gjykata e Posaçme gjatë muajit shkurt, pasi dyshohen për kryerjen e veprave penale “Sigurimi i kushteve dhe i mjeteve materiale për të kryer vrasje”, “Mbajtja pa leje dhe prodhimi i armëve, armëve shpërthyese dhe i municionit”, të kryera në bashkëpunimin e posaçëm të grupit të strukturuar kriminal, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”.
Në pranga ka rënë një 35-vjeçar, i cili sipas policisë kishte 3 identitete, M. K. alias M. I. alias M. M., banues në Vlorë.
Gjithashtu, në funksion të këtij vendimi penal u bë shpallja në kërkim e shtetasve L. Z. dhe E. Z.
