”WhatsApp” po prezanton disa përditësime të reja të sigurisë, me synim mbrojtjen e përdoruesve nga hakerët, mashtrimet dhe marrja e paautorizuar e llogarive.
Një nga ndryshimet kryesore lidhet me verifikimin me dy hapa. Në vend të PIN-it tradicional me gjashtë shifra, përdoruesit do të mund të përdorin një fjalëkalim më të avancuar, i cili mund të përmbajë shkronja, numra dhe karaktere speciale.
”WhatsApp” po shton gjithashtu më shumë informacion për telefonatat nga numra të panjohur. Kur një përdorues merr një telefonatë nga një person që nuk është në listën e kontakteve, aplikacioni mund të tregojë nëse numri është nga një shtet tjetër apo nëse përdoruesi ka grupe të përbashkëta me telefonuesin.
Kjo veçori synon të ndihmojë përdoruesit të identifikojnë më lehtë telefonatat potencialisht të dyshimta dhe të shmangin mashtrimet. Për momentin, funksioni është i disponueshëm vetëm në pajisjet Android.
”WhatsApp” po rekomandon gjithashtu përdorimin e passkeys, të cilat mundësojnë hyrjen në llogari përmes gjurmës së gishtit, njohjes së fytyrës ose kodit të ekranit të telefonit.
Sipas kompanisë, më shumë se 1 miliard përdorues kanë vendosur tashmë një passkey. Tashmë është e mundur edhe regjistrimi i disa passkeys në të njëjtën llogari, një opsion veçanërisht i dobishëm për personat që përdorin më shumë se një pajisje.
Me këto ndryshime, ”WhatsApp” synon të rrisë sigurinë e llogarive dhe t’u japë përdoruesve më shumë mjete për të identifikuar dhe shmangur kërcënimet online.
