Elon Musk ka sulmuar publikisht filmin e ri të regjisorit Christopher Nolan, “The Odyssey”, përmes postimeve dhe komenteve në platformën X, duke ironizuar zgjedhjet e kastit, veçanërisht për përzgjedhjen e Lupita Nyong’o si Helena e Trojës.
Musk i nisi kritikat që në muajin shkurt, kur qarkulluan zëra se Nyong’o do të luante këtë rol. Fituesja e çmimit Oscar, Lupita Nyong’o, do të interpretojë Helenën e Trojës, një zgjedhje kontroverse që ka ngritur debat në të gjithë botën për veprën e Homerit të realizuar vizualisht.
Kritikët shtuan se Nolan “po synon trofetë”, duke lënë të nënkuptohet se regjisori po ndryshon përkatësinë racore të personazheve për të përfituar në garën për Oscar. Në postime të tjera, Musk ripublikoi mesazhe që pretendonin se Nolan po “shkelte mbi varrin e Homerit” me zgjedhjet e tij për kastin.
Kur roli i Lupita Nyong’o ishte ende vetëm një thashethem, Musk kishte shpërndarë një postim ku thuhej se do të ishte “fyerje për Homerin” nëse aktorja do të luante Helenën e Trojës, pasi poeti grek e përshkruante personazhin si me lëkurë të bardhë, flokë bionde dhe si “fytyra që nisi një mijë anije”, aq e bukur saqë burrat nisën një luftë për të. Në atë kohë, Musk komentoi: “Chris Nolan e ka humbur integritetin.”
