Një sasi lënde plasëse ka shpërthyer në orët e para të mëngjesit të kësaj të premteje përpara banesës së shefit të Krimeve në Shkodër.
Policia bën me dije se si pasojë janë shkaktuar dëmtime të lehta në banesën e tij, si dhe është një dëmtuar automjet.
Po ashtu uniformat blu njoftojnë se është ngritur një grup i posaçëm hetimor për zbardhjen e kësaj ngjarjeje dhe nga veprimet e para hetimore, janë siguruar prova që do të çojnë në identifikimin dhe kapjen e autorit/ëve.
“Rreth orës 03:50, në lagjen Dobraç, ka shpërthyer një sasi lënde plasëse, përpara banesës së shtetasit Pëllumb Shpati, 49 vjeç, me detyrë shef i Seksionit për Hetimin e Krimeve, në Komisariatin e Policisë Shkodër.
Si pasojë janë shkaktuar dëmtime të lehta në banesën e tij, si dhe është dëmtuar automjeti i tij.
Grupi i posaçëm hetimor i ngritur për zbardhjen e kësaj ngjarjeje, nga veprimet e para hetimore, ka siguruar prova që do të çojnë në identifikimin dhe kapjen e autorit/ëve”-njofton policia.
Nën drejtimin e Prokurorisë pranë Gjykatës së Rrethit Gjyqësor Shkodër, vijon puna për zbardhjen e rrethanave të kësaj ngjarjeje.
