Zbardhen detaje të reja nga operacioni që u finalizua pasditen e djeshme në Fushë Kuqe ku u arrestua shefi i komisariatit të Kurbinit, Dritan Metaj.
Nga të dhënat paraprake rezulton se ka pasur rol të rëndësishëm në grupin kriminal të trafikut të drogës në Fushë Kuqe.
Metaj dyshohet se kryente rolin e transportuesit të anëtarëve të grupit kriminal, mes tyre edhe baronin e drogës Gëzim Çelaj, duke shfrytëzuar postin e tij si komisar policie për t’i lëvizur pa i kontrolluar dhe dyshuar askush tek ata.
SPAK dyshohet se ka gjetur biseda të shumta të Metajt me Gëzim Çelajn dhe 2 të tjerët të shpallur në kërkim.
Megjithatë, me urdhër të SPAK, janë kryer përgjime të tjera në javët e fundit, të cilat kanë dhënë prova mbështetëse për dokumentimin e veprimtarisë kriminale.
