Një aksident tragjik është regjistruar pasditen e kësaj të marte pranë rrethrrotullimit të TEG-ut, ku një betoniere ka dalë nga rruga dhe ka rënë nga lartësia në autostradë.
Sipas të dhënave paraprake, drejtuesi i betonieres ka humbur jetën në vendngjarje, ndërsa një person tjetër ka mbetur i plagosur dhe është transportuar drejt spitalit për të marrë ndihmën mjekësore.
Raportohet se, para se të binte nga mbikalimi, betonierja është përplasur me disa mjete .
Në vendngjarje kanë mbërritur forca të shumta policie, zjarrfikës dhe ekipe të urgjencës, ndërsa po punohet për nxjerrjen e automjeteve të përfshira dhe zbardhjen e plotë të rrethanave të aksidentit.
Autoritetet pritet të japin më shumë detaje mbi shkaqet e ngjarjes dhe gjendjen e të plagosurit.
