Një ngjarje e rëndë dhune ka ndodhur brenda një familje në Korçë.
Ngjarja ka ndodhur 6 ditë më parë, kur Fatos Mulla ka hedhur nga shkallët e shtëpisë private bashkëshorten e tij, D.Mulla 55 vjeç, duke i shkaktuar thyerje të këmbës së djathtë.
Bëhet e ditur se bashkëshorti e ka mbajtur 55-vjeçaren në banesë deri ditën e djeshme e më pas e ka dërguar në spital, ku e dhunuara ka treguar se si ka ndodhur ngjarja.
Ajo ka thënë se shkak për ngjarjen është bërë një motiv banal, një gotë vaji.
55-vjeçarja ka probleme shëndetësore pasi ka pësuar paralizë dhe vuan nga zemra, pra konsiderohet si person invalid.
Ajo ka treguar se bashkëshorti e dhunonte prej kohësh, ndërsa nuk ka guxuar ta denoncojë për shkak të frikës.
E dhunuara ka bërë denoncimin sot para uniformave blu, ndërsa bashkëshorti Fatos Mulla u shoqërua në komisariat për të dhënë deklaratën e tij.
Përgjatë këtyre ditëve, bashkëshorti nuk e ka lejuar të kontaktojë me familjarët e saj. Mësohet se vajza e vetme e çiftit jeton prej vitesh në Itali.
Nga ana tjetër, bashkëshorti i saj Fatos Mulla ka mohuar në polici akuzat e ngritura nga bashkëshortja e tij. Ai ka thënë se 55-vjeçarja është rrëzuar vetë dhe se nuk e ka shtyrë ai.
Sipas policisë, hetimet do të vijojnë për veprën penale të “dhunës në familje”.
