Policia e Fierit ka reaguar në lidhje me një video të publikuar në rrjete sociale ku shihej një person duke u konfliktuar me punonjësin e Policisë në Patos.
Blutë e Fierit bëjnë me dije se B.H., 57 vjeç në gjendje të dehur ka shkuar dhe ka kërcënuar punonjësin e policisë me gërshërë.
B.H., është shoqëruar në komisariat dhe po kryhen veprimet hetimore në lidhje me rastin.
Njoftimi i Policisë:
Në lidhje me një video të publikuar në rrjetet sociale ku shfaqet një shtetas në ambientet e stacionit të Policisë Patos, duke u konfliktuar me punonjësin e Policisë, ju sqarojmë se:
Shtetasi B. H., 57 vjeç, banues në Rërës, Patos, në gjendje të dehur, ka shkuar në Stacionin e Policisë Patos, dhe ka kanosur me një palë gërshërë punonjësin e Policisë që ishte me shërbim, shtetasin B. K., 54 vjeç, banues në Fier.
57-vjeçari u shoqërua në ambientet e Komisariatit të Policisë Fier dhe po kryhen veprimet nga OPGj i Prokurorisë për arrestimin në flagrancë të tij për veprën penale “Kanosja për shkak të detyrës”.
