Parlamenti francez ka miratuar një ligj që synon të kufizojë konfliktet mes fqinjëve dhe të shmangë paditë “abuzive” nga “banorët neoruralë” kundër fermerëve.
Projektligji, i paraqitur nga deputetja e shumicës në pushtet, Nicole Le Peih, dhe i mbështetur nga qeveria qendrore e Presidentit Emmanuel Macron, u miratua me 78 vota pro dhe 12 kundër dhe tani do të kalojë në Senat.
Ligji i ri për “tingujt dhe erërat e fshatit” synon t’u japë më shumë mbrojtje fermave ekzistuese nga banorët e sapoardhur në zonë.
Banorët e qytetit që shpërngulen në fshatrat franceze, vetëm për të gjetur zhurmën e këndimit të gjelave, lehjen e qenve, makineritë bujqësore ose erën e plehut organik që nuk mund të durojnë, nuk do ta kenë më aq të lehtë të bëjnë një ankesë.
Ministri i Drejtësisë, Eric Dupond-Moretti, tha në platformën e mediave sociale X: “Ky ligj do t’i japë fund padive abuzive kundër fermerëve që nuk bëjnë gjë tjetër veç punës së tyre: na ushqejnë”.
Franca dhe vendet e tjera alpine kanë pasur një histori të gjatë konfliktesh midis ish-banorëve të qyteteve dhe fqinjëve të tyre të rinj në fshat.
Në vitin 2021, Franca prezantoi legjislacionin për të mbrojtur “trashëgiminë shqisore të fshatit francez”.
Por ligji ka rezultuar i vështirë për t’u zbatuar me ankesat e paraqitura për “trazira anormale të lagjeve” që deri tani janë lënë në diskrecionin e gjyqtarëve.
Gati 500 fermerë aktualisht po përballen me padi nga fqinjët që kanë probleme me zhurmën ose aromat që dalin nga fermat e tyre.
