Greqia po mendon të frenojë përdorimin e mediave sociale për fëmijët nën 15 vjeç me një “portofol për fëmijë”, sipas ministres së Familjes.
Sofia Zacharaki tha për TV SKAI, se masa është për të mbrojtur fëmijët nga rreziqet e internetit të pambikëqyrur dhe mediave sociale, ndërsa ajo tërhoqi vëmendjen për shqetësimet për varësinë digjitale dhe izolimin e shkaktuar nga mediat sociale.
Portofoli do t’i lejojë prindërit të bllokojnë ueb sajte specifike duke përdorur fjalë kyçe dhe të monitorojnë trafikun në internet të fëmijëve të tyre.
Ndalimi tërësisht i mediave sociale është jorealist, por rritja e mbikëqyrjes është thelbësore pasi fëmijët shpesh tërhiqen në botët virtuale, të cilat i ekspozojnë ata ndaj rreziqeve të mëdha, duke përfshirë depresionin dhe shkëputjen nga realiteti, tha Zacharaki.
“Prindërit shprehin shqetësime serioze, por ngurrojnë të kufizojnë fëmijët e tyre përmes teknologjisë. Ekziston një vijë e hollë midis garantimit të sigurisë dhe lejimit të lirisë. Teknologjia mund të jetë edhe kërcënim edhe mjet për t’u mbrojtur nga keqpërdorimi,” shtoi ajo.
