Dy turistë francezë, mbetën të bllokuar për disa orë në Përmet, pasi automjeti i tyre pësoi defekt.
Makina me të cilin eksploronin zonën u fik teksa dy shtetasit ndodheshin në fshatin Pavar.
Atyre u erdhi në ndihmë policia, që i transportoi drejt hotelit ku ishin akomoduar në Këlcyrë, në gjendje të mirë shëndetësore. Gjithashtu, u transportua edhe automjeti i tyre.
Njoftimi i policisë:
Shërbimet e Komisariatit të Policisë Përmet iu shkojnë në ndihmë 2 turistëve francezë, të cilët kishin mbetur në mesnatë, në fshatin Pavar, për shkak të një defekti në automjetin e tyre.
Sapo janë njoftuar, rreth orës 00:20, se 2 turistë francezë kishin mbetur në territorin e fshatit Pavar, për shkak se automjeti me të cilin eksploronin zonën, kishte defekt, shërbimet e Komisariatit të Policisë Përmet kanë shkuar në zonë, për t’ju ofruar ndihmë.
Turistët janë lokalizuar dhe janë transportuar nga shërbimet e Policisë, në hotelin ku ishin akomoduar, në Këlcyrë, në gjendje të mirë shëndetësore. Gjithashtu, është transportuar automjeti i tyre.
Ata kanë falënderuar shërbimet e Policisë së Përmetit, për ndihmën e dhënë në kohë rekord.
Policia e Gjirokastrës mbetet e angazhuar maksimalisht në shërbim të qytetarëve dhe të vizitorëve, dhe i fton ata që për çdo rast nevoje për ndihmë, të telefonojnë në numrin pa pagesë 112.
