”Luftëtari” i Gjirokastrës ka dhënë një tjetër sinjal pozitiv në përgatitjet për sezonin e ri, duke triumfuar bindshëm në transfertë ndaj ”Butrintit” të Sarandës me rezultatin 0-3.
Skuadra gjirokastrite u shfaq më e organizuar dhe më efikase gjatë takimit, duke arritur të shfrytëzojë mundësitë e krijuara përpara portës kundërshtare.
”Luftëtari” e ndërtoi gradualisht fitoren dhe në fund mori një sukses të pastër, që i jep skuadrës besim për vazhdimësinë.
Zani ishte autori i golit të parë për ”Luftëtarin”, duke i dhënë avantazhin skuadrës së tij dhe duke hapur rrugën drejt fitores.
Pas golit të parë gjirokastritët vijuan të luanin me qetësi, ndërsa ”Butrinti” u përpoq të reagonte dhe të rikthehej në lojë.
Megjithatë ”Luftëtari” ishte më konkret në fazën sulmuese dhe arriti të shënonte edhe golin e dytë.
Ishte Buxaj ai që dërgoi topin në rrjetë duke e çuar rezultatin në 0-2 dhe duke e bërë më të vështirë detyrën për skuadrën sarandjote.
Në pjesën e mbetur të ndeshjes ”Butrinti” kërkoi të shkurtonte diferencën, por ”Luftëtari” u mbrojt mirë dhe nuk lejoi që vendasit të gjenin golin.
Goli i tretë erdhi nga Devolli i cili ‘vulosi’ fitoren e ”Luftëtarit” dhe rezultatin përfundimtar 0-3.
Në fund ”Luftëtari” largohet nga Saranda me një fitore të merituar dhe një paraqitje që lë përshtypje pozitive.
Tre gola të shënuar dhe porta e paprekur janë një tregues i mirë për skuadrën gjirokastrite, e cila vijon punën dhe përgatitjet për sezonin e ri.
Kujtojmë se vetëm pak ditë më parë ”Luftëtari” e mundi me rezultatin e thelle 6-1 ”Butrintin”, ndeshje kjo që u zhvillua në stadiumin e Gjirokastrës.
