{"id":97714,"date":"2026-04-29T13:04:48","date_gmt":"2026-04-29T11:04:48","guid":{"rendered":"https:\/\/jugulajm.net\/?p=97714"},"modified":"2026-04-29T13:05:37","modified_gmt":"2026-04-29T11:05:37","slug":"video-shqiperia-do-te-prodhoje-anije-nenshkruhet-marreveshja-me-kompanine-italiane","status":"publish","type":"post","link":"https:\/\/jugulajm.net\/?p=97714","title":{"rendered":"VIDEO\/Shqip\u00ebria do t\u00eb prodhoj\u00eb anije, n\u00ebnshkruhet marr\u00ebveshja me italian\u00ebt"},"content":{"rendered":"

Kryeministri i vendit, Edi Rama, ishte i pranish\u00ebm n\u00eb firmosjen e marr\u00ebveshjes mes shoq\u00ebris\u00eb Fincantieri, nj\u00eb nga kompanit\u00eb m\u00eb t\u00eb m\u00ebdha t\u00eb ekselenc\u00ebs n\u00eb Europ\u00eb, dhe kompanis\u00eb KAYO, p\u00ebr t\u00eb prodhuar n\u00eb Shqip\u00ebri, n\u00eb kantierin e Pashalimanit, anije lundruese.<\/p>\n

Sipas Ram\u00ebs, kjo nd\u00ebrmarrje do t\u00eb fokusohet n\u00eb prodhimin e anijeve q\u00eb do t\u00eb sh\u00ebrbejn\u00eb jo vet\u00ebm p\u00ebr Forcat e Armatosura t\u00eb Shqip\u00ebris\u00eb, por edhe p\u00ebr ushtrit\u00eb e vendeve aleate. Projekti pritet t\u00eb rris\u00eb kapacitetet prodhuese dhe t\u00eb forcoj\u00eb bashk\u00ebpunimin ushtarak n\u00eb rajon.<\/p>\n

Kryeministri e cil\u00ebsoi marr\u00ebveshjen si nj\u00eb mund\u00ebsi t\u00eb r\u00ebnd\u00ebsishme p\u00ebr t\u00eb rinjt\u00eb, ve\u00e7an\u00ebrisht p\u00ebr nx\u00ebn\u00ebsit e shkoll\u00ebs Industriale t\u00eb Vlor\u00ebs. Ai theksoi se ata do t\u00eb jen\u00eb nd\u00ebr t\u00eb par\u00ebt q\u00eb do t\u00eb p\u00ebrfshihen n\u00eb programe t\u00eb posa\u00e7me trajnimi, me synimin p\u00ebr t\u2019u b\u00ebr\u00eb pjes\u00eb e k\u00ebsaj industrie t\u00eb re n\u00eb qytetin e tyre.<\/p>\n

\u201cPartneritet strategjik me qeverin\u00eb e Italis\u00eb. Kjo \u00ebsht\u00eb nj\u00eb marr\u00ebveshje me Fincantieri p\u00ebr t\u00eb krijuar nj\u00eb shoq\u00ebri t\u00eb re p\u00ebr t\u00eb prodhuar n\u00eb Shqip\u00ebri, n\u00eb kantierin e Pashalimanit, anije lundruese, q\u00eb jan\u00eb n\u00eb dobi t\u00eb ushtris\u00eb shqiptare, por edhe p\u00ebr ushtri t\u00eb tjera t\u00eb vendeve aleate.<\/p>\n

Kjo marr\u00ebveshje \u00ebsht\u00eb nj\u00eb lajm shum\u00eb i mir\u00eb p\u00ebr t\u00eb rinjt\u00eb, p\u00ebr vajzat dhe djemt\u00eb e shkoll\u00ebs Industriale t\u00eb Vlor\u00ebs, t\u00eb cil\u00ebt do t\u00eb jen\u00eb t\u00eb par\u00ebt q\u00eb do t\u00eb ftohen p\u00ebr t\u00eb marr\u00eb pjes\u00eb n\u00eb nj\u00eb rrug\u00ebtim formimi t\u00eb p\u00ebrshtatur p\u00ebr t\u00eb qen\u00eb nes\u00ebr pjes\u00ebmarr\u00ebs t\u00eb k\u00ebsaj shoq\u00ebrie t\u00eb re ekselence n\u00eb territorin e tyre, n\u00eb qytetin e tyre\u201d, tha Rama.<\/p>\n

\"\"<\/figure>\n

Ministri i Mbrojtjes, Ermal Nufi, tha se marr\u00ebveshja sjell vende t\u00eb reja pune dhe fuqizim t\u00eb eksportit.<\/p>\n

\u201cSot, me k\u00ebt\u00eb n\u00ebnshkrim, shoq\u00ebria KAYO fillon nj\u00eb hap t\u00eb ri. Do t\u00eb arrijm\u00eb t\u00eb prodhojm\u00eb p\u00ebr nevojat e eksportit. Shqip\u00ebria b\u00ebhet nj\u00eb baz\u00eb e re europiane e Fincantierit p\u00ebr anijet e vogla dhe t\u00eb mesme, duke zgjeruar aktivitetin. Fincantieri do t\u00eb sjell\u00eb edhe pun\u00eb dhe, n\u00eb planin e biznesit q\u00eb kemi n\u00ebnshkruar, rreth 400 persona do t\u00eb pun\u00ebsohen n\u00eb k\u00ebt\u00eb kantier t\u00eb ri. Rritje e kapaciteteve vendase prodhuese dhe humane\u201d, tha ministri i Mbrojtjes, Ermal Nufi.<\/p>\n

P\u00ebrfaq\u00ebsuesi i Fincantierit tha se kjo marr\u00ebveshje mbart strategji dhe ambicie.<\/p>\n

\u201cSi\u00e7 sapo kemi diskutuar, ka shum\u00eb strategji dhe ambicie pas k\u00ebsaj marr\u00ebveshjeje. Nuk \u00ebsht\u00eb vet\u00ebm d\u00ebshira p\u00ebr t\u00eb ndjekur nj\u00eb program, por p\u00ebr t\u00eb nxjerr\u00eb di\u00e7ka produktive me ambicie. Mund t\u00eb kemi nj\u00eb produkt q\u00eb ta p\u00ebrdorim n\u00eb eksportin e Fincantierit, duke pasur modernizim, konkurrenc\u00eb dhe ide t\u00eb reja p\u00ebr anijen dhe procesin produktiv\u201d, tha p\u00ebrfaq\u00ebsuesi i Fincantierit.<\/p>\n